Chunautiyon se bhare Femina Hindi ke December ank kee cover girl hain Kareena Kapoor. Kareena bata rahi hain ki kis tarah ve zindagee ko apnee sharton par jeena pasand kartee hain aur ye bhee ki pati Saif Ali Khan kee kaun-see baat unhe bahut bhaati hai. Chunki ye is varsh ka Aakiree ank hai ath humne saal bhar kee News kee surkhiyaan bhee isme sametee hain. Baat chunautiyon ki karen to aap is ink me bahut hi prabal ichchashakti waali mahilaon se milengee, jinme shaamil hain ek varsh me sehatmand tareeke se 35 kg vazan kam karnewaali mahila, aisee beemaree ko harakar, jo unhe saari umra bistar par pade rahne ko majboor kar deti, khud fitness expert bankar doosaron ko chust-durust banaane ka kaam shuru karnewaali mahila, ghutno me chot ke saath Himachal me trekking karnewaali mahila... In mahilaaon kee kahaani aapko zaroor prerit karegee. Purane careers kee nai chunautiyon se do-do haath kartee kuch mahilaaon se milkar aap jaan sakengi ki unke kshetron me ve kitane naye aur anoothe kaam kar rahi hain. Aur yadi aap foodie hain to gehu, chawal aur sabziyon se bane kuch naye swaad zaroor chakhen, jinhe banaane ki vidhi bhee aapko is ank me milegi.