Femina Hindi ke May ank ki cover girl hain Bipasha Basu, jo Bollywood ki fittest abhinetriyon me ek hain. Bipasha ki manein to log bhale hi unhe sirf fitness premi ke taur par jante hon, par ve pakki zaikebaaz bhi hain. Is ank se Femina Hindi apne naye abhiyan Shanti ka paigham ka aagaz karne ja rahi hai. Hinsa se bejar is duniya me sarhadon par koi yuddha ho ya kisi desh ke bheetar koi andarooni sangharsh… har tarah ki hinsa me sabse zyada ghav mahilayein aur bacche hi jhelte hain. Bavjood iske ye tathya hai ki hinsa ko khatm karne me pahle bhi mahilaon ne aham bhoomnika nibhai thi, aur aaj bhi nibha rahi hain. Yahi karan hai ki hamne Shanti ka paigham ke zariye aapko desh-videsh ki aisi mahilaon se milane ka nishchay kiya jo apni jaan jokhim me dalkar aman ki bahali ka har sambhav prayas kar rahi hain. Is ank me aap Nagaland me shanti ki alakh jaga rahi Dr. Rosemary Dzuvichu se milengi aur Gujrat me alpsankhyak mahilaon ke haq ki ladai lad rahi Zakia Soman se. Iske alava shadiyon me Maaon dwara nibhai janevali khas rashmein hamse baant rahi hain kuch mahilayein. Himachal Pradesh me dharm ke naam par janvaron ke balidan par pratibandh lagvane me badi bhoomika nibhanevali Sonali Pureval bhi is ank ka chehra hain. Femina ka khas Fashion-Beauty Section apni sari khoobiyon ke saath maujood hai hi. Ummid hai ki ahinsa aur aman se juda yah ank aapko pasand aayega.